AI Song Contest, conhecido como a “Eurovisom” mundial da inteligência artificial, celebrará a sua ediçom 2023 na cidade da Corunha dia 4 de novembro. A cita deste ano, apresentada na Sede Afundación A Coruña, leva por lema “Walking With AI” (O Caminho da IA), e celebra a diversidade de jeitos de trabalhar a inteligência artificial na música no campo internacional, com os artistas no centro do processo de composiçom.
Esta
quarta ediçom contará com umha cerimónia de inauguraçom, que terá lugar na
sexta, 3 de novembro, à noite, antes do grande dia, no CSA da Cidade das TIC, o
mesmo recinto que acolherá o congresso “AI & Creation Day” durante a manhá
e tarde do sábado, com umha programaçom de palestras e mesas de debate
académicas arredor da música gerada com inteligência artificial e sobre os
direitos de propriedade intelectual.
Especialistas
na matéria também contribuirám sobre as estratégias criativas empregadas polas
equipas finalistas, proporcionando informaçom sobre os processos inovadores que
há detrás das suas composiçons geradas por IA. Ademais, o público presencial e
em linha terám a oportunidade de descobrir como se está a trabalhar na Galiza a
inteligência artificial e, especialmente, como se aproveita a IA para preservar
e contribuir à língua galega.
Depois
da jornada de divulgaçom, os assistentes desfrutarám da espetacular Grande
Final em Studio Follow, localizado na Grela, com um programa de televisom ao
vivo para celebrar a música co-criada entre indivíduos e máquinas, e onde a
cultura galega estará mui presente. Rematará com umha festa posterior no mesmo
estúdio. A primeira série de bilhetes será posta à venda a partir desta sexta 7
de julho às 12:00 horas através da plataforma Ticket Hoy.
Com
este certame, A Corunha converte-se na capital mundial da música escrita com
inteligência artificial, aproveitando a acolhida da futura AESIA. Assim, a
organizaçom também reconhece o título de anfitriom da equipa PAMP!, subcampeom
o ano passado com “AI-Lalelo” e ganhador da residência artística do concurso em
Sony CSL París, polo que terá a oportunidade de representar outra vez a Galiza,
classificada diretamente à final.
Aberto o prazo de candidaturas
Até
4 de setembro, convida-se a artistas, adeptos da inteligência artificial e
outros perfis ligados à inovaçom cultural de todo o mundo a apresentar a sua
composiçom co-criada com IA. Deste jeito, a organizaçom esperam receber
composiçons musicais de todos os géneros, desenvolvidas por equipas compostas
por músicos, técnicos e engenheiros com ajuda da inteligência artificial.
O
público e um júri de profissionais da IA e da indústria musical julgarám nom só
a qualidade das cançons, também a qualidade e a inovaçom na interaçom entre
artistas e algoritmos. A competiçom deste ano também fai finca-pé na
responsabilidade dos criadores e na transparência no uso da inteligência
artificial, polo que premiará os grupos que podam demonstrar princípios éticos
sólidos com respeito aos dados de adestramento e participaçom dos artistas.
Todos
os detalhes e actualizaçons sobre o evento podem revisar-se na página web oficial do AI Song Contest.
Sobre o AI Song Contest
AI
Song Contest é um concurso internacional que mostra o potencial criativo da
música gerada por IA. Está organizado por AI Song Contest Foundation. Desde a
sua criaçom em 2020, AI Song Contest está na vanguarda da IA e a música,
fomentando a inovaçom e promovendo o diálogo entre artistas, científicos e o
público. Os ganhadores do ano passado recebêrom prémios em metálico e a
oportunidade dumha residência artística dumha semana em Sony CSL Paris. In “Portal
Galego da Língua” - Galiza
Sem comentários:
Enviar um comentário