Galiza - Falo galego, fala-me português!

A AGAL, Associaçom Galega da Língua, lança a campanha Falo galego, fala-me português para sensibilizar as pessoas lusófonas sobre a realidade linguística galega. A campanha promove que as pessoas galegofalantes e lusófonas se comuniquem entre elas sem mudarem a língua

Existe uma queixa contínua cada vez que uma pessoa galega visita Portugal: “É que eu lhes falo em galego, e sempre me respondem em portunhol”. O motivo de que isto aconteça nom é desleixo nem maldade, é simplesmente desconhecimento. A maioria das pessoas que falam português nom conhecem a realidade linguística galega e nom sabem da continuidade linguística que existe entre as duas beiras do Minho.

É por isso que a AGAL decidiu lançar a campanha Falo galego, fala-me português. Com este slogan tam simples, a campanha quer dar a conhecer o galego às pessoas de todos os países de língua oficial portuguesa. Por um lado, a campanha procura que quando uma pessoa galega visite um país de língua portuguesa, as pessoas estejam sensibilizadas com a sua realidade. Que saibam que é uma pessoa galega a falar em galego, e nom uma pessoa castelhanofalante a esforçar-se por falar em português. E que saibam que essa pessoa galega agradece que lhe falem em português, e nom quer que a outra pessoa se esforce em falar castelhano ou portunhol. Polo outro lado, a campanha também quer mostrar a Galiza como uma terra acolhedora para todas as pessoas que falam português. Que saibam que podem vir falando na sua língua e que vam ser entendidas, que nom é preciso que mudem de língua para falarem com as pessoas galegas.

A Campanha

A campanha começou oficialmente no dia 25 de julho, coincidindo com o Dia Nacional da Galiza. A primeira açom fôrom as camisolas com o logo da campanha, pensadas para que as pessoas galegas vistam quando visitem Portugal. As camisolas estivérom disponíveis no posto que tivo a AGAL no Festigal e esgotárom-se no mesmo dia. “Estamos totalmente abraiados”, dixo Jon Amil, presidente da associaçom, “nom esperávamos que a campanha tivesse um recebimento tam grande”.

A campanha continuará a desenvolver-se nos próximos meses, com mais camisolas, crachás e outros objetos promocionais. Também se apostará polas redes sociais como vetor para visibilizar a campanha no mundo, com vídeos de pessoas relevantes da cultura e da internet. “Isto está apenas a começar”, declarou Jon Amil. In “Portal Galego da Língua” - Galiza

Galiza - O festival “Aquí tamén se fala” consolida-se na sua terceira ediçom e dá o salto internacional

O projeto nascido no IES Rafael Dieste da Corunha converte um instituto público num referente europeu da dinamizaçom cultural e linguística a partir da mocidade

A Corunha converterá-se de novo na sexta-feira 12 de junho, e desde as 17h00, num dos grandes epicentros da música em galego e das culturas atlânticas com a celebraçom da terceira ediçom do Festival Aquí Tamén Se Fala, uma iniciativa impulsada polo IES Rafael Dieste que continua ampliando horizontes e fazendo história.

O evento, que nasceu nas aulas dum instituto público da cidade e que terá de novo lugar na Praça da Tolerância, consolida-se este ano como um festival de dimensom internacional graças à incorporaçom ao cartaz da artista portuguesa Carolina Deslandes, uma das vozes mais relevantes da música lusa contemporânea e auténtico fenómeno social com um milhom de seguidóries no Instagram num país de pouco mais de dez milhões de habitantes.

A presença de Deslandes supom um novo marco para um festival que, desde a sua criaçom, conseguiu situar a música e a lingua galegas num espaço de prestígio, convivência e celebraçom coletiva.

Junto à artista portuguesa atuarám as bandas galegas Apolo 18, Kid Mount e De Ninghures, três propostas que representam a diversidade, a renovaçom e o momento de efervescência criativa que vive atualmente a música galega.

O festival é uma das iniciativas mais visíveis de Aquí Tamén Se Fala (ATSF), o maior movimento de dinamizaçom linguística do país, nascido no IES Rafael Dieste e convertido já num fenómeno social e educativo sem precedentes. O que começou como uma campanha impulsada polo alunado para visibilizar a presença do galego nos bairros da Corunha acabou estendendo-se a centos de centros educativos de todo o país, mobilizando dezenas de milhares de estudantes e recebendo reconhecimentos como o Prémio da Cultura Galega, o Innovagal, o Rosalia de Castro da Deputaçom da Corunha ou o Mil Primaveras.

A singularidade do projeto reside em que som es própries estudantes quem lideram boa parte das ações, assumindo tarefas de comunicaçom, produçom audiovisual, organizaçom cultural e dinamizaçom social.

Ao longo dos últimos anos, ATSF conseguiu converter as redes sociais num escaparate para a cultura galega, contando com a participaçom de figuras de referência do âmbito musical, literário, audiovisual e desportivo, e construindo uma narrativa positiva ao redor da língua que conseguiu conectar com uma nova geraçom.

Neste contexto, o festival representa muito mais do que uma programaçom musical. É a culminaçom anual dum modelo educativo inovador que entende a cultura como ferramenta de transformaçom social e a língua como espaço de encontro. O facto de que um instituto público seja capaz de organizar um evento destas características continua a ser um caso praticamente sem precedentes na Europa, reforçando o papel da educaçom pública como motor de criaçom cultural e participaçom cidadã.

Após reunir por volta de 5000 pessoas em cada uma das suas anteriores edições, o Festival Aquí Tamén Se Fala encara este novo capítulo com a ambiçom de continuar a crescer sem renunciar à sua essência: demonstrar que a mocidade pode liderar projetos culturais de grande impacto e que a língua galega tem capacidade para ocupar com naturalidade os cenários, as ruas, os ecrãs e os espaços de referência do presente.

A terceira ediçom do festival confirma deste modo que o fenómeno Aquí Tamén Se Fala já transcendeu o âmbito educativo para se converter num dos movimentos culturais mais inovadores e influentes da Galiza atual. In “Portal Galego da Língua” - Galiza